新手玩3d printer 全紀錄

7 min readMay 2, 2020

自從租左studio 仔無耐我就急不及待買左一部3D printer, 以為憑著以前學過少少3d modeling 同埋係學校用過下3d printer 係好容易，自己搞一定實無死，結果發現原來對3d printing 仿如白紙，簡直I am nothing，撞左唔少板。話雖如此，但過程中令我學習到好多野，who doesn’t learn from their failure，所以想寫低過程中挫折與得著，同大家分享下。

無咩budget，當然第一時間當然去taobao 睇下有咩平野la ，而家最平同最易砌易用ge 係 fdm printer，所以呢篇文都會圍繞呢款printer 為主。

揀機篇

Taobao 上面1000 － 2000 元ge 3d printer 全部都好似樣，原來有得解點係係咁。話說有個好好人ge Dr Adrian Bowyer博士開左係2005 年開左一個叫reprap ge project，opensource 左個3d printer ge 設計，影響左成個3d printing 產業，有好多機，例如prusa 系列就係其中一個成功ge 衍生品。

而中國，亦有創想三維（creality 3D）呢間公司 opensource 左佢地ge 產品，基於中國製造一定平同埋用得下，成功佔據到低價市場。佢地ge ender 3 係外國市場都好似好出名同好多人用。當然亦因為opensource ge 關係就有其他廠商參考左，再出自己ge 改進機型。

講左咁耐故仔，係時侯講番d 機款。

Creality 3D

佢地最多一談及ge 係ender 系列，暫時最新係 Ender 3S

打印呎寸有 220 * 220 * 250mm，作為新手打印下ge figure，parts 等等應該好夠。

外國好多人用，所以相對多評測同埋好多人畫左唔同ge upgrades for 呢部機，所以擴充性算大，加上一體式發貨，買番黎調平就用得（利申無買過，by 官方說法），對於一無所知，淨係有一股衝勁想玩3d print ge 人（好似我當時咁）呢部應該好岩。

咁當然講到咁方便就緊係價錢會貴少少，aroud 1400 人仔

Taobao 傳送門

Anycubic

同級價錢仲有呢anycubic ge i3 mega s

呢部特點係全金屬機身，

兩邊都有絲杆限位，我有friend 買左，整體comment 造工好實淨，用touch screen 加埋精格玻璃熱床，都幾靚仔。雖然唔係一體機出貨，但係安裝只係8粒螺絲同插番幾條電線。都算好方便。不過相對體積大同重，大家要留意番。

Taobao 傳送門

Two Trees

不過我最後買左ge 係 Two Trees ge Bluer

因為真係好平， 980 就有
225*225*275 GE 打印呎寸唔洗一千人仔，其他真係搵唔到。用touch screen 加埋火牛收係機箱裡面，藍黑配搭﹐真係加分。不過買到番黎先知好多野要自己砌，對於一無所知ge 我係好有難度。好彩搵到條片（傳送門）教點砌，跟住做就ok，花左我一日到去研究點整，好痛苦不過熟左好多原理，買機黎研究ge 話係好適合。

Taobao 傳送門

留意番好多都係so call ge 領卷再減﹐即係要係間舖首頁，或者叫客服比條優惠卷link 你，咁左先係1400 同980 個d 價錢，大家記得禁。

唔鍾意睇字可以睇表

成品及作品展

我覺得not bad，對得起1000蚊紙，砌隻義肢手都仲得。

技術分享

Leveling (調平）

買左部機番黎先知大部份機都要做熱床調平，好多機種都係用螺絲加彈弓上實熱床，運輸／裝機個時會令到熱床前後左右唔係100％平。唔平ge 熱床會令到印野個時d 膠落得唔平均，個模型自然唔smooth，更甚者會導致成個模型翹起／摑噴嘴，印唔成，所以調平好重要。

上網好多人教係用張普通a4 紙sip 落個噴嘴同熱床中間，擰到個張紙唔會夾實左，feel 到少少同噴嘴ge 磨擦，可以拉得番張紙出黎就叫ok。

我覺得呢個講法有d 虛，點叫少少磨擦呢？

後來同個朋友講開，佢建議左個做法我覺得唔錯。佢話朝擺張紙係兩者中間，較到可以輕鬆拉張紙出黎（張紙要無噴嘴ge 壓痕）之後，sip 唔番張紙入去就叫ok。我覺得呢個對我具體d。歡迎大家交流下你地ge 做法。

熱床面層選擇

以我所知主流有3款熱床面，磁鋼，玻璃，同膠片。

膠版係好平同埋我覺得幾耐用ge，不過每次印完要用鏟刀起番個模型都幾哂我時間同心力，所以玩左3日我已經即刻買左玻璃用。

玻璃／鏡個好處就係熱個時會痴膠，空溫個時唔痴，輕鬆取模。通常都係40－70 蚊到可以買到一塊，相對算係平ge upgrade。用d 文件夾夾住佢同熱床就ok。留意番買薄ge 就ok，我買個間鏡最薄3mm／玻璃最薄2mm， 45蚊塊 235mm * 235mm 叫佢磨到唔界手就ok。上網有人話鏡有多層coating 會令到表面更平滑，我未試鏡同玻璃ge 分別，不過用鏡我自己係幾鍾意ge，好方便同埋有時睇住個倒影印野都幾過癮，好魚樂無窮haha。

最後係磁鋼。未買黎試，特別係可以同個熱床分離同屈到，取模容易。話係最好ge 熱床面層，不過就要成一百蚊先有，遲d 買黎試完再補用後感。

前面ender 3s 係配磁鋼床、anycubic i3 mega s 係晶格玻璃、bluer 係bluer logo ge 膠片（我覺得design 好靚，亦係我買呢部ge 原因haha），大家可以考慮埋upgrade 成本如有興趣的話。